Friday, January 8, 2016

IS အဖွဲ့သားက သူ့မိခင်ကို ကိုယ်တိုင် ကွပ်မျက်

 IS ဌာနချုပ် ဖြစ်တဲ့ ရက်ကာ မြို့မှာ သတ်ဖြတ် ခဲ့တာလို့ သတင်းတွေက ဆို။

IS အစ္စလာမ္မစ် နိုင်ငံအဖွဲ့ဝင် စစ်သွေးကြွ တစ်ယောက်က သူ့ကို IS အဖွဲ့ထဲကနေ ထွက်ဖို့ ပြောတဲ့ မိခင် ဖြစ်သူကို လူမြင်ကွင်းမှာ သူကိုယ်တိုင် ကွပ်မျက် လိုက်တယ်လို့ ဆီးရီးယားမှာ ရှိတဲ့ လှုပ်ရှားသူ တွေက ပြောပါတယ်။

ဆီးရီးယား နိုင်ငံ၊ ရက်ကာ မြို့က စာတိုက်ရုံး အပြင်ဘက်မှာ ၂၁ နှစ်အရွယ် Ali Saqr ဆိုသူက သူ့မိခင် Lena al-Qasem ကို သတ်ဖြတ် ခဲ့တာလို့ မျက်မြင် သက်သေတွေက ပြောပါတယ်။

ရက်ကာ မြို့ကို IS အဖွဲ့က ၂၀၁၃ ခုနှစ် သြဂုတ်လမှာ သိမ်းခဲ့ပြီးနောက် သူတို့ရဲ့ ဌာနချုပ် မြို့အဖြစ် သုံးလာခဲ့တာ ဖြစ်ပါတယ်။

IS အဖွဲ့ဟာ သူတို့နဲ့ သဘောကွဲလွဲမှု အားလုံးကို လုံးဝ ခွင့်လွှတ်လေ့ မရှိဘဲ အများရှေ့မှာ ရက်စက်တဲ့ ပြစ်ဒဏ်တွေ ပေးလေ့ ရှိပါတယ်။

Lena al-Qasem က သူ့သားကို ဖြောင်းဖျ ပြောဆိုရာမှာ အမေရိကန် ဦးဆောင်တဲ့ တပ်ဖွဲ့တွေက IS အဖွဲ့ကို ချမှုန်းပစ်မှာ ဖြစ်လို့ သူမနဲ့ အတူ မြို့ကနေ ထွက်ခွာဖို့ ပြောခဲ့တာလို့ သတင်းတွေက ဆိုပါတယ်။

အဲဒီလို ပြောတဲ့ အကြောင်းကို သားဖြစ်သူက IS အဖွဲ့ကို သတင်း ပေးခဲ့ပြီးနောက် သူ့မိခင်ကို ကွပ်မျက်ဖို့ သူ့ကို ခိုင်းခဲ့တာ ဖြစ်ပါတယ်။
BBC Burmese

0 comments:

Post a Comment