Sunday, January 17, 2016

ကလေးခိုး အမှုတွေ မမှန်ဘူးလို့ ရဲတပ်ဖွဲ့ပြော

နယ်ဒေသ အချို့မှာ ကလေးသူခိုး တွေ ရောက်နေတယ်ဆိုတဲ့ တိုင်းတန်းမှုတွေ ရှိခဲ့
မြန်မာပြည်က နေရာရာ အနှံ့မှာ ကလေး သူခိုး တွေ သောင်းကျန်း တယ်ဆိုတဲ့ ကောလာဟလကို အခြေခံ ပြီး ထင်ယောင်ထင်မှားဖြစ်သူတွေကို ဝိုင်းရိုက်တဲ့ ဖြစ်စဉ်တွေ ပေါ်ပေါက်နေပါတယ်။

မကွေးမြို့မှာ ကလေးခိုးတယ်ဆိုပြီး စွပ်စွဲခံရလို့ အမျိုးသမီး တစ်ဦး ဝိုင်းရိုက် ခံရသလို မန္တလေး မရမ်းခြံ သင်္ဘောဆိပ်မှာ အမျိုးသားတစ် ဦးကို ဝိုင်းရိုက်လို့ အသက်ဆုံးတဲ့ ထိဖြစ်ခဲ့ပါတယ်။

ကလေးခိုးတဲ့အမှုတွေ တကယ်ရှိနေလားလို့ လူကုန်ကူးမှုတားဆီးနှိမ်နှင်းရေးအဖွဲ့က ရဲမှူးကြီး ခင်မောင်လှ ကို ဆက်သွယ်မေးမြန်းကြည့်တော့ ၂၀၁၅ ခုနှစ်မှာဆိုရင် မလေးရှား နိုင်ငံမှာ တောင်းရမ်းခိုင်းဖို့ ခေါ်သွား တဲ့ ကလေး ၃ ယောက် အမှု ရှိခဲ့တယ်လို့ ပြောပါတယ်။

၂၀၁၆ ခုနှစ်မှာတော့ ပြည်တွင်း လူကုန် ကူးမှု အဖြစ် အသက် ၁၃ နှစ်အရွယ် အမျိုး သမီးငယ်တစ်ယောက် ကို ပြည့်တန်ဆာလုပ်ငန်းမှာ ခိုင်းစားဖို့ ခေါ်ဆောင်လာတဲ့ အမျိုးသမီး တစ်ဦးကို အရေးယူခဲ့တာတွေ ရှိတယ်လို့ ပြောပါတယ်။

မန္တလေးတိုင်း၊ မကွေးတိုင်း၊ ဧရာဝတီ တိုင်းနဲ့ နယ်ဒေသ အချို့မှာ ကလေးသူခိုး တွေ ရောက်နေတယ်ဆိုတဲ့ တိုင်းတန်းမှုတွေ ရှိခဲ့ပြီး စုံစမ်း ဖော်ထုတ် တဲ့ အခါမှာ တကယ့် ကလေးခိုးတဲ့ အဖြစ်မှန် မရှိဘူးလို့ ဆက်ပြောပါတယ်။

ကလေးသူငယ်တွေကို ခိုးယူနေတယ်လို့ သံသယ ရှိခဲ့မယ် ဆိုရင် သက်ဆိုင်ရာ အဖွဲ့အစည်းတွေကို လူထု အနေနဲ့ အကြောင်းကြားဖို့ နဲ့ လူမှုကွန်ယက်တွေ ပေါ်မှာ ပျံနှံ့နေတာဟာ မမှန် သတင်းတွေသာ ဖြစ်တယ် လို့လည်း ပြောပါတယ်။

ကလေး ခိုးယူသူတွေ ရှိနေတယ်လို့ ဖုန်းဆက် တိုင်ကြားခဲ့တဲ့ အမှုတွေကိုလည်း အချိန်နဲ့ တပြေးညီ စုံစမ်းဖော်ထုတ် အရေးယူဖို့ ဆောင်ရွက် နေတယ်လို့ ရဲမှူးကြီးက ဆက်ပြောပါတယ်။
BBC Burmese

0 comments:

Post a Comment