Monday, October 26, 2015

ထမင်းသိုးကို အိုးအသစ်ထဲ ထည့်ပေမယ့် သိုးနေတဲ့ထမင်းက သိုးနေတာပါပဲ


(အောက်တိုဘာ ၂၇ ရက်နေ့ထုတ် The Daily Eleven သတင်းစာ၏ အယ်ဒီတာ့အာဘော်)

“ထမင်းသိုးကို အိုးအသစ်ထဲကို ထည့်ပေမယ့် သိုးနေတဲ့ထမင်းက သိုးနေတာပဲ” ဟူသော မှတ်ချက်စကား ကို အမျိုးသား ဒီမိုကရေစီ အဖွဲ့ချုပ်ဥက္ကဋ္ဌ ဒေါ်အောင်ဆန်းစုကြည်က ကော့မှူးမြို့နယ် အတွင်း ရှိ ကျေးရွာများမှ ဒေသခံများနှင့် တွေ့ဆုံရာတွင် ထည့်သွင်း ပြောကြားခဲ့သည်။ ပညာရေးစနစ်၊ လူထု၏ ဥာဏ်ရည် ဥာဏ်သွေး ကဲ့သို့သော လူထု၏ အခြေခံ အနေအထားများ နိမ့်ပါးသွားရကာ ကိုယ့်ဘ၀ ကိုယ်ရပ်တည်နိုင်ရန် များစွာရုန်းကန် နေရသည့် အနေအထား၌ ယင်းမှတ်ချက် စကားသည် များစွာစဉ်းစား ချင့်ချိန်နိုင်စေသော မှတ်ချက်စကားဖြစ်သည်။

အဘယ်ကြောင့် ၂၀၁၅ အထွေထွေ ရွေးကောက်ပွဲက မြန်မာနိုင်ငံ ရှေ့ခရီးအတွက် အလွန်အရေး ပါ နေရသနည်း။ အဘယ်ကြောင့် လူတစ်ဦးချင်းစီ၏ မဲပေးခွင့်က မည်မျှအထိ အရေးပါ နေရသနည်း။ အဘယ်ကြောင့် ရွေးကောက်ပွဲ မှန်ကန်မျှတရန် လိုအပ်နေသနည်း။ ဤရွေးကောက်ပွဲမှ မည်သို့သော အစိုးရတစ်ရပ် ထွက်ပေါ်ရန် မဖြစ်မနေ လိုအပ်နေရသနည်း။ ဤမေးခွန်းများအတွက် ရှင်ကြီးဝမ်းနှင့် ရှင်ငယ်ဝမ်းများ ၀င်ခဲ့ဖူးသော လူထုလူတန်းစား အလွှာအသီးသီးရှိ ပြည်သူအားလုံး၏ ရင်ထဲတွင် အဖြေရှိနေပြီ ဖြစ်သည်။

၂၀၁၅ နိုဝင်ဘာ ၈ ရက်တွင် ကျင်းပမည့် ရွေးကောက်ပွဲနေ့ ရောက်ရှိရန် ၁၂ ရက်သာ လိုတော့ သည်။ ရွေးကောက်ပွဲအပေါ် စိတ်ဝင်စားမှု၊ ရွေးကောက်ပွဲဝင် ကိုယ်စားလှယ်လောင်းများ၊ ရွေးကောက်ပွဲဝင် ပါတီများ၏ မဲဆွယ်စည်းရုံးခြင်း၊ ရွေးကောက်ပွဲ အကြိုကာလ ကတိစကားများ၊ မှတ်ချက်များ၊ လုပ်ဆောင် မှုများ၊ အဖြစ်အပျက်များအပေါ် လူထု၏ စိတ်ဝင်တစား ပါဝင်မှု အရှိန်မြင့်လာသည်။ ၂၀၁၀ ပြည့်နှစ် အထွေထွေ ရွေးကောက်ပွဲ အကြိုကာလ အခြေအနေနှင့် ယခု ၂၀၁၅ အထွေထွေ ရွေးကောက်ပွဲ အကြိုကာလ လူထုစိတ်ဝင်စားမှု အခြေအနေများ မတူခြားနားမှုများနှင့် အရှိန်အဟုန်လှိုင်းလုံး အပြောင်း အလဲများ ပိုကြီးထွားလာသည်။ မဲဆွယ်စည်းရုံးကာလ စတင်ချိန်မှစ၍ အရှိန်ပိုကောင်းလာရာ ယခုအခါတွင် လမ်းပေါ်မှာ သွားလာနေသူများ၊ အနှေးယာဉ် အပါအ၀င် ယာဉ်အမျိုးမျိုးနှင့် ရပ်ကွက်မြို့ရွာများ ရှိ နေအိမ်အချို့တို့တွင် မိမိတို့ လိုလားထောက်ခံသည့် ပါတီအထိမ်းအမှတ် တံဆိပ်နှင့် အလံများ ချိတ်ဆွဲထားသည်ကို ပိုမိုတွေ့မြင် လာရသည်။

Social Media လူမှုကွန်ရက် စာမျက်နှာပေါ်တွင် မိမိကြိုက်နှစ်သက်သည့် ပါတီနှင့် သက်ဆိုင်ရာ ကိုယ်စားလှယ် လောင်းများအပေါ် အမြင်သဘောထားများ ပွင့်ပွင့်လင်းလင်း ထုတ်ဖော်မှု ပိုမိုပြုလုပ် လာကြသည်။ Facebook သုံးစွဲသူ အများစုသည် ၎င်းတို့ ယုံကြည်အားထား မဲပေးမည့် ပါတီနှင့် ကိုယ်စားလှယ်လောင်းများ ကိုယ်စားပြု အထိမ်းအမှတ် Logo ပါဝင်သည့် Profile Picture များ ပြောင်းလဲအသုံးပြု လာကြသည်။ ပြီးခဲ့သည့် ရက်ပိုင်းများက ပြည်ပရောက် မြန်မာနိုင်ငံသားများ၏ ကြိုတင်မဲပေးစဉ်က အချို့မဲပေးသူများ မည်သည့်ပါတီကို မည်သည့် အတွက်ကြောင့် ရွေးချယ်မဲပေးသည်ကို မိမိတို့၏ Facebook စာမျက်နှာများတွင် အသိပေးရေးသား လာသကဲ့သို့ ပြည်တွင်းတွင် မဲပေးကြမည့်သူ အချို့ကလည်း မည်သည့်ပါတီကို မည်သည့် အတွက်ကြောင့် ရွေးချယ်မဲပေးလိုကြောင်း၊ မည်သည့်ပါတီကို မည်သည့် အတွက်ကြောင့် ကြိုက်နှစ်သက်ခြင်း မရှိကြောင်း အမြင်သဘောထားများ ပွင့်ပွင့်လင်းလင်း ထုတ်ဖော်လာကြသည်။

သို့ပါ၍ မကြာမီ ရောက်ရှိလာတော့မည့် အထွေထွေ ရွေးကောက်ပွဲနှင့်အတူ မိမိတို့ လိုလားသော နိုင်ငံနှင့် လူထုအတွက် အမှန်တကယ် လိုအပ်သော အပြောင်းအလဲများ အတွက် “ထမင်းသိုးနှင့် အိုးအသစ်” စကားကဲ့သို့ မှတ်ချက်မျိုးကို သတိပြုဆင်ခြင် သင့်ပါကြောင်း The Daily Eleven သတင်းစာက ရေး သားအပ်ပါသည်။
Eleven Media Group

0 comments:

Post a Comment