Tuesday, October 14, 2014

မြန်မာနှစ်ဦး စွပ်စွဲဖမ်းဆီးခံထားရသည့် ခိုထောင်ကျွန်းလူသတ်မှု စုံစမ်းစစ်ဆေးရာတွင် ကူညီရန် ဗြိတိန်ကမ်းလှမ်းချက်ကို ထိုင်းဝန်ကြီးချုပ် ပယ်ချ


October 15, 2014
ထိုင်းနိုင်ငံ ခိုထောင်ကျွန်းတွင် ဗြိတိန်နိုင်ငံသား ခရီးသည်နှစ်ဦး သတ်ဖြတ်ခံရခြင်းနှင့် ပတ်သက်၍ စုံစမ်းစစ်ဆေးမှုများအား ကိုင်တွယ်နေသည့်အပေါ် စိုးရိမ်ပူပန်မှုများ မြင့်တက်နေချိန်၌ ထိုင်းအာဏာ သိမ်းခေါင်းဆောင် ဝန်ကြီးချုပ် ပရာယွတ်ချန်အိုချာက မြန်မာနှစ်ဦးကို စုံစမ်းစစ်ဆေးနေသည့် အမှုသည် ယုံကြည်စိတ်ချရပြီး ယင်းအမှုသည် ထိုင်းနိုင်ငံ၏ ပြည်တွင်းရေးဖြစ်ကြောင်း အောက်တိုဘာ ၁၄ ရက်တွင် ပြောကြားခဲ့သည်။

ဒေးဗစ်မီလာ (၂၄ နှစ်) ကို သတ်ဖြတ်မှုနှင့် ဟန်နာဝှစ်သာရစ် (၂၃ နှစ်) ကို မုဒိမ်းကျင့် သတ်ဖြတ်ခဲ့မှုတို့ အတွက် ထိုင်းရဲတပ်ဖွဲ့က မြန်မာရွှေ့ပြောင်း အလုပ်သမားနှစ်ဦးကို တရားစွဲဆိုခဲ့သည်။ ထိုင်းရဲတပ်ဖွဲ့ က မြန်မာနှစ်ဦးသည် ပြစ်မှုကျူးလွန်ကြောင်း ဝန်ခံခဲ့ပြီး သူတို့၏ DNA နမူနာများသည် ဝှစ်သာရစ်၏ ခန္ဓာကိုယ်မှရရှိသော DNA နမူနာများနှင့် ကိုက်ညီမှုရှိသည်ဟု ဆိုသည်။

ယင်းလူသတ်မှုကို ကိုင်တွယ်ဖြေရှင်းနေမှုအား နက်နက်ရှိုင်းရှိုင်း စိုးရိမ်နေကြချိန်တွင် စုံစမ်းစစ်ဆေးမှုအ တွက် ကူညီရန် ဗြိတိန်က ကမ်းလှမ်းခဲ့ပြီးနောက် ထိုင်းဝန်ကြီးချုပ်၏မှတ်ချက် ထွက်ပေါ်လာခဲ့ခြင်းဖြစ်သည်။

သို့သော်လည်း တရားခံဟု သံသယရှိခံရသည့် မြန်မာနှစ်ဦးသည် နှိပ်စက်ညှဉ်းပန်းခံရပြီး ဝန်ခံခဲ့ရကြောင်း သတင်းများ ထွက်ပေါ်ခဲ့သောကြောင့် ယင်းအမှုကို ဘဝင်မကျမှုများ ပိုမိုနက်ရှိုင်းလာခဲ့သည်။ သို့သော်လည်း ထိုင်းအစိုးရက ယင်းစွပ်စွဲချက်ကို ပြင်းပြင်းထန်ထန် ငြင်းဆိုထားသည်။

“ခိုထောင်အမှုဟာ ယုံကြည်စိတ်ချရတယ်လို့ ကျွန်တော်ယူဆပါတယ်” ဟု ပရာယွတ်က သတင်းထောက် များကို ပြောကြားခဲ့သည်။ ထို့ပြင် မြန်မာရွှေ့ပြောင်း အလုပ်သမားနှစ်ဦးကို စွဲချက်တင်ရန် အထောက်အ ထား အမြောက်အမြားရှိကြောင်း ၎င်းက ထပ်မံပြောကြားခဲ့သည်။

“ဘယ်သူမဆို ထိုင်းကိုလာနိုင်ပါတယ်။ ဒါပေမဲ့ ကျွန်တော်တို့အရေးဟာ ကျွန်တော်တို့အရေးပဲ ဆိုတာ ကို မေ့လို့မရပါဘူး” ဟု သူက ဗြိတိန်၏ ကမ်းလှမ်းမှုအား ရည်ညွှန်းပြီး ပြောကြားခဲ့သည်။

“အစပိုင်းတုန်းက မဖြစ်နိုင်ဘူး ထင်ခဲ့ရပေမယ့်လည်း သံသယရှိသူတွေကို ကျွန်တော်တို့ အမြန်ဆုံး ဖမ်းဆီးနိုင်ခဲ့ပါတယ်” ဟု ပရာယွတ်က ပြောကြားခဲ့သည်။

ဗြိတိန်သံအမတ်ကြီး မက်ကန့်က သူသည် မြန်မာသံအမတ်ကြီး၊ ထိုင်းရဲတပ်ဖွဲ့၊ ထိုင်းနိုင်ငံခြားရေး ဝန်ကြီးဌာနမှ တာဝန်ရှိသူများနှင့် တွေ့ဆုံဆွေးနွေးခဲ့သည်ဟု အေအက်ဖ်ပီ သတင်းဌာနသို့ ပြောကြား ခဲ့သော်လည်း အသေးစိတ် ပြောပြခဲ့ခြင်း မရှိပေ။

အဆိုပါ တွေ့ဆုံဆွေးနွေးမှုမတိုင်ခင် မြန်မာနိုင်ငံ နေပြည်တော်ရှိ သမ္မတရုံးမှ အရာရှိတစ်ဦးက ယင်းတွေ့ဆုံဆွေးနွေးမှုသည် အများက ထိုင်းအာဏာပိုင်များအနေဖြင့် မှားယွင်းကိုင်တွယ်မှုများ ရှိခဲ့သည်ဟု စွပ်စွဲထားသော အဆိုပါအမှုနှင့် ပတ်သက်၍ မျှတ၍ စစ်မှန်သော စုံစမ်းစစ်ဆေး မှု ပြုလုပ်ရေးအတွက် အထောက်အကူဖြစ်စေရန် မျှော်လင့်ကြောင်း အေအက်ဖ်ပီသို့ ပြောကြားခဲ့သည်။

အောက်တိုဘာ ၁၃ ရက်တွင် ဗြိတိန်အစိုးရသည် လန်ဒန်ရှိ ထိုင်းနိုင်ငံ သံအမတ်ကို ဆင့်ခေါ်ကာ အမှုအား စုံစမ်းစစ်ဆေးမှုကို ကိုင်တွယ်ပုံနှင့် ပတ်သက်၍ အမှန်တကယ် စိုးရိမ်မိကြောင်း အထူးပြု ပြောကြားခဲ့ သည်။ 

ဗြိတိန်အငယ်တန်း နိုင်ငံခြားရေးဝန်ကြီး ဟူးဂိုးဆဝိုင်ကလည်း ကြေညာချက်တစ်ရပ် ထုတ်ပြန်ခဲ့ရာတွင် အမှုအား စုံစမ်းစစ်ဆေးရေးနှင့် ဥပဒေဆိုင်ရာ လုပ်ငန်းစဉ်များ ဆက်လက်ဆောင်ရွက်ရေးကို အကူအညီပေးရန်အတွက် ဗြိတိန်ရဲတပ်ဖွဲ့အနေဖြင့် အသင့်ရှိကြောင်း ဖော်ပြခဲ့သည်။ သို့သော် ထိုင်းအစိုးရက ဗြိတိန်၏ ကူညီရန်ကမ်းလှမ်းမှုကို တုံ့ပြန်ခြင်းရှိမရှိ သေချာစွာသိရခြင်း မရှိသေးပေ။

အခင်းဖြစ်ပွားပြီးနောက် ရက်များအတွင်း စုံစမ်းစစ်ဆေးမှုများ အလွဲလွဲအချော်ချော် ဖြစ်နေသည်ဟု ဗြိတိန်မီဒီယာများ ဦးဆောင်ကာ စွပ်စွဲဝေဖန်မှုများ ထွက်ပေါ်ခဲ့သောကြောင့် ထိုင်းအာဏာပိုင်များ အား ပြင်းထန်သော စောင့်ကြည့်သုံးသပ်မှုများ ဖြစ်ပွားနေသည့်အချိန်တွင် မြန်မာရွှေ့ပြောင်း အလုပ်သမားနှစ်ဦးကို ဖမ်းဆီးခဲ့ခြင်းဖြစ်သည်။
Eleven Media Group

0 comments:

Post a Comment