Thursday, October 9, 2014

မီဒီယာများနှင့် တွေ့ဆုံ ရှင်းလင်းပွဲတွင် ရန်ကုန်အစိုးရ အဖွဲ့ဝင်များ အိပ်ငိုက်

Photo by Khing Mg Win - AP
ရန်ကုန်၊ အောက်တိုဘာ ၉
နိုင်ငံတော် ဘတ်ဂျက်ကိစ္စ၊ အစိုးရ၏ ပြုပြင်ပြောင်းလဲရေး ကိစ္စများကို မီဒီယာများနှင့် တွေ့ဆုံ ရှင်းလင်းခဲ့ သည့် နိုင်ငံတော် သမ္မတရုံး ၀န်ကြီးဦးစိုးသိန်းနှင့် အခြားပြည်ထောင်စု ၀န်ကြီး(၂)ဦးတို့၏ ရှင်းလင်းပွဲသို့ တက်ရောက် ခဲ့သည့် ရန်ကုန်တိုင်းဒေသကြီး အစိုးရ အဖွဲ့ဝင်များ၏ အိပ်ငိုက်နေသည့်ပုံများ ““အိပ်မက်ဆုံ ရာ”” ခေါင်းစဉ်ဖြင့် ယခုရက်ပိုင်းတွင် လူမှုကွန်ရက်စာ မျက်နှာများ၌ ပျံ့နှံ့ခဲ့ပြီးနောက် ပြည်သူများ အကြား ပြောဆိုဝေဖန်မှုများ ရှိနေသည်။

Photo by Khing Mg Win - AP
 အဆိုပါပုံများ အွန်လိုင်း လူမှုကွန်ရက် စာမျက်နှာတွင် ပျံ့နှံ့ခဲ့ခြင်းနှင့် ပတ်သက်၍ ““ပြည်ထောင်စု ၀န်ကြီး သုံးပါးရဲ့ သတင်းစာ ရှင်းလင်းပွဲ၊ ဦးစိုးသိန်းက မီဒီယာတွေနဲ့ တွေ့ပြီးတော့ ဘတ်ဂျက်တွေ၊ အဓိက ဘတ်ဂျက် တွေပေါ့ကွာ။ ဘဏ္ဍာရေးဝန်ကြီးရယ်၊ အမျိုးသား စီမံကိန်းဝန်ကြီး ဒေါက်တာကံဇော်ရယ်၊ သမ္မတရုံးဝန်ကြီး ဦးစိုးသိန်းရယ် ကိုယ်စားလှယ် (၃)ယောက်က နေပြီးတော့ မီဒီယာ တွေ့ဆုံရှင်းလင်းပွဲ ဆိုပြီးတော့ကွာ ဘတ်ဂျက် ကိစ္စတွေကို ရှင်းပြနေတာ။ တစ်ယောက်တစ်ယောက် အကြာကြီးပေါ့ကွာ။ ရန်ကုန်တိုင်း အစိုးရက လူတွေ သူ့တို့ဘာသာ စိမ်ပြေနပြေ အိပ်နေတာပေါ့”” ဟု အဆိုပါပုံများကို စတင်ဖြန့်ဝေခဲ့သည့် AP သတင်း ဌာန၏ ဓာတ်ပုံသတင်းထောက် ဦးခင်မောင်ဝင်း (ရွှေအင်း သား)က မြန်မာသံတော်ဆင့်သို့ အောက်တိုဘာ (၈) ရက်နေ့တွင် ပြောသည်။

အဆိုပါ မီဒီယာ ရှင်းလင်းပွဲတွင် ၀န်ကြီးဦးစိုးသိန်းက ပြည်သူများ အခွန်ဆောင်ခြင်းကို အလှူပေးသည်ဟု သဘောထားရန် ပြောကြားချက် တွင်““ကျွန်တော်လည်း အခွန်ပေးရမယ်။ မည်သူမဆို အခွန်ပေး တာကို ပျော်နေ ရမယ်။ အလှူပေးသလို ဖြစ်နေရမယ်။ အဲဒါမှ အိပ်မက်တွေကို အကောင်အ ထည် ဖော်နိုင် မယ်။ အဲဒါမှ နိုင်ငံတော် တိုးတက်မယ်””ဟု ထည့်သွင်း ပြောဆိုချက်မှာ အွန်လိုင်း လူမှုကွန် ရက် စာမျက်နှာများတွင် ပျံ့နှံ့ နေသည့် အစိုးရအဖွဲ့ဝင်များ အိပ်ငိုက်သည့်ပုံများကို “အိပ်မက်ဆုံရာ”ဟု ခေါင်း စဉ် ပေးထားသည်နှင့် ကိုက်ညီမှု ရှိကြောင်း ထောက်ခံ ပြောဆိုမှုများလည်း ရှိသည်။

အဆိုပါပွဲသို့ တက်ရောက်ခဲ့ပြီး ရန်ကုန်တိုင်း ဒေသကြီး အစိုးရအဖွဲ့ဝင်များ အိပ်ငိုက်နေသည့် ပုံများနှင့် ပတ်သက်၍““ဒါကတော့ လူဆိုတာ ရုပ်နဲ့နာမ်နဲ့ ဖွဲ့စည်းထားတာ၊ ငိုက်ရင်လည်း ငိုက်မှာပဲလေ။ ရန်ကုန် တိုင်း အစိုးရက အင်မတန် အလုပ်များပါတယ်။ စနေ၊ တနင်္ဂနွေတောင် မနားရပါဘူးဗျာ။ ကျွန်တော်တို့ ဆိုလည်း ညမိုးချုပ် အလုပ်လုပ်၊ မနက်(၆)နာရီ၊ (၇)နာရီ အစည်းအဝေးလာ၊ အလုပ်လုပ်ဆိုတော့ ငိုက်မိတာတော့ ရှိမှာပဲ””ဟု ရန်ကုန်တိုင်း ဒေသကြီးအစိုးရ ရခိုင် တိုင်းရင်းသားရေးရာ ၀န်ကြီး ဦးဇော်အေးမောင်က မြန်မာ သံတော်ဆင့်သို့ ပြောသည်။

အဆိုပါပွဲတွင် အိပ်ငိုက်ခဲ့သည့်ပုံများ အွန်လိုင်း လူမှုကွန်ရက် စာမျက်နှာများတွင် ပျံ့နှံ့ခဲ့ပြီးနောက် ထိုသို့သော အခြေအနေများ နောက်နောင် မဖြစ်စေရန် အတွက်ကိုလည်း ““ကျွန်တော်တို့က တစ်ချိန်လုံး ငိုက်နေတာ မဟုတ်ဘူး။ ခဏလေး မှေးလိုက်၊ နားထောင်လိုက်။ ဒါကို စကန်ရှော့ ရိုက်ပြီးတော့ လုပ်လိုက် တာလေ။ အပြစ် မပြောပါဘူး။ နောက် ကျွန်တော်တို့ ဆင်ခြင်ရမှာပေါ့။ ကျွန်တော်တို့ကတော့ ကိုယ့် ကိုယ်ကိုယ်ပဲ ဆင်ခြင် ရမယ်လို့ သုံးသပ်ပါတယ်””ဟု ၀န်ကြီး ဦးဇော်အေးမောင်က ပြောကြားသည်။

အဆိုပါပွဲကို သမ္မတရုံးဝန်ကြီး ဦးစိုးသိန်းနှင့် ဘဏ္ဍာရေးဝန်ကြီး ဦးဝင်းရှိန်၊ စီးပွားရေး ဖွံ့ဖြိုး တိုးတက်မှု ၀န်ကြီး ဒေါက်တာကံဇော်တို့ သုံးဦးက မီဒီယာတွေ့ဆုံ ရှင်းလင်းပွဲ ပြုလုပ်ခဲ့ခြင်း ဖြစ်သော်လည်း မီဒီယာများ မှ မေးမြန်း ရာတွင် လွတ်လပ်မှု မရှိကြောင်းကို ““အဲဒီမှာ ပိုဆိုးတာက ဦးစိုးသိန်းက စာရွက်ကြီး ကိုင်ပြီးတော့ ဘယ်သူ မေးပါ၊ ဘယ်ဝါမေးပါ ဆိုပြီးတော့။ သတင်းထောက်တွေကွာ ပွဲကြီးတစ်ပွဲကွာ၊ သူမေးချင်တဲ့သူ မေးမှာပေါ့။ မဟုတ်ဘူး၊ သူက ဘယ်သူမေး၊ ဘယ်သူမေး ဆိုပြီးတော့ လုပ်နေတယ်”” ဟု အဆိုပါပွဲသို့ တက်ရောက်သူ ဦးခင်မောင်ဝင်း(ရွှေအင်းသား) က မြန်မာသံတော်ဆင့်သို့ ပြောသည်။
ရှိန်းဝေနောင်
မြန်မာသံတော်ဆင့်သတင်းဌာန

0 comments:

Post a Comment