Friday, August 29, 2014

ကျုံးဘေးနှင့် လမ်းလယ်ကျွန်းများတွင် စည်းကမ်းမဲ့ နွားလွှတ်ကျောင်းခြင်းကို အရေးယူမည်


မန္တလေးမြို့နှင့် ကျုံးအနီးတ၀ိုက်တွင် စည်းကမ်းမဲ့ လွှတ်ထားသည့် နွားများအား စည်ပင်သယာရေးမှ ၂၀၁၄ ခုနှစ် သြဂုတ်လ ၂၈ ရက်နေ့တွင် ဖမ်းဆီးအရေးယူနေသည်ကို တွေ့ရစဉ်။ (ဓာတ်ပုံ - အောင်ကိုဦး၊ မဇ္ဈိမ)

မန္တလေးမြို့ ကျုံးဘေးနှင့် လမ်းလယ်ကျွန်းများတွင် နွားများကို စည်းကမ်းမဲ့ လွှတ်ကျောင်းခြင်းကို ဖမ်းဆီး အရေးယူမှုများ လုပ်နေသည်ဟု မန္တလေးမြို့တော် စည်ပင်သာယာရေးကော်မတီမှ လက်ထောက်ကြီး ကြပ်ရေးမှူး ဦးစိုးနိုင်ထွန်းက သြဂုတ် ၂၈ ရက်တွင် မဇ္ဈိမကို ပြောသည်။

“အဓိကတော့ ကျုံးဘေးကို စည်းကမ်းမဲ့ လွှတ်ကျောင်းနေကြတဲ့ နွားတွေကို ဖမ်းဆီးနေတယ်။ အဲဒီနွားတွေ က ကျုံးဘေးမှာ စိုက်ထားတဲ့ အပင်တွေနဲ့ လမ်းလယ်ကျွန်းတွေမှာ အလှစိုက်ပျိုးထားတဲ့ အပင်တွေ ကိုက်ဖြတ် ဖျက်ဆီးတာတွေရှိတယ်။ ဒါကြောင့် စောင့်ကြည့်ဖမ်းဆီးမှုတွေ လုပ်နေတယ်” ဟု ၎င်းက ပြောသည်။

ဖမ်းဆီးထားသော နွားများကို ရေတံခွန်တောင်အနီးတွင် ထိန်းသိမ်းသွားမည်ဖြစ်ပြီး နွားပိုင်ရှင်များ ကို ခေါ်ယူ၍ ပညာပေးဆွေးနွေးမှုများလုပ်၍ ဒဏ်ငွေသတ်မှတ်တပ်ရိုက်သွားမည်ဟု ဆိုသည်။

လက်ရှိတွင် ဒဏ်ကြေးငွေသတ်မှတ်ထားခြင်းမရှိသေးသော်လည်း နွားကြောင့် ပျက်စီးခဲ့သည့်အပေါ် မူတည်၍ ဒဏ်ငွေ ပေးဆောင်ရမည်ဟု ဆိုသည်။

ကျုံးဘေးသို့ နွားများ လွတ်လာတတ်သည့် အချိန်သည် ညပိုင်းသာ အများဆုံးဖြစ်သဖြင့် စောင့်ကြည့် ဖမ်းဆီးသွားမည်ဟု သိရသည်။

“အခုလို ကျုံးဘေးမှာ နွားတွေ လွတ်နေတော့ သွားလာနေတဲ့ သူတွေအတွက် အန္တရာယ်ဖြစ်နိုင် တယ်။ နောက်တစ်ခုက မြို့သာယာလှပအောင် စိုက်ထားတဲ့အပင်တွေပျက်တယ်။ မြို့လယ်ခေါင်နွားတွေ လွတ်နေတော့ မြို့လည်း အကျည်းတန်တယ်” ဟု ၎င်းက ပြောသည်။

သြဂုတ်၂၈ ရက်တွင် နွားဖမ်းဆီးခံရသော နွားပိုင်ရှင်တစ်ဦးကလည်း “သေချာလွှတ်ကျောင်းတာ မဟုတ်ပါဘူး။ ညပိုင်းမှာ လွတ်သွားတာပါ။ တစ်ခါမှတော့ ဒီလို မဖြစ်ဖူးပါဘူး။ သတ်မှတ်ထားတဲ့ စည်းကမ်းအတိုင်းပဲ လုပ်ဆောင်သွားမှာပါ။ အခုလို စည်းကမ်းနဲ့အညီ ထိန်းသိမ်းတာကို ကြိုဆိုပါတယ်”ဟု ၎င်းက ပြောသည်။

“ရပ်ကွက်ထဲ ၀င်လာတဲ့ နွားတွေကိုလည်း ဖမ်းသင့်ပါတယ်။ အိမ်ရှေ့စိုက်ထားတဲ့ အပင်ကတော့ ခဏခဏ နွားလာ စားလို့ ကုန်တော့မယ်။ မြင်တိုင်း မောင်းလွှတ်နေရတယ်။ ရပ်ကွက်တွေထဲ ၀င်လာတဲ့ နွားတွေလည်း ဖမ်းဆီးပေးဖို့ တောင်းဆိုချင်တယ်” ဟု ၃၂ ကွက် ဘုန်းတော်တိုး တွင် နေထိုင်သည့် ဦးသိန်းအောင်က ပြောကြားခဲ့သည်။

အောင်မြေသာစံမြို့နယ်တွင် တစ်နိုင်တစ်ပိုင် နွားမွေးမြူထားသူ ကိုဇော်ဝင်းက နွားများ မကြာခဏလွှတ်ခြင်း သည် မန္တလေးမြို့တွင် စားကျက်မြေများ ပျောက်သွားခြင်းကြောင့်ဖြစ်သည်ဟု ဆိုသည်။
အောင်ကိုဦး
Mizzima - News in Burmese

0 comments:

Post a Comment