Wednesday, August 13, 2014

ဒီမိုကရေစီကို အလွဲသုံးနေတဲ့ တရုတ်ဆေးခန်းများ

ရန်ကုန်မြို့ထဲ လမ်းလျှောက်ရင်း တစ်နေရာရာမှာ ကျန်းမာရေးဆိုင်ရာ စာအုပ်ငယ်များ ကမ်းတတ်တဲ့ အချိန် တော်တော်များများ ကြုံဖူးကြမှာပါ။ “တရုတ်ဆေးခန်း ကြော်ငြာ”ဖြစ်တယ်။

ရန်ကုန်တိုင်းဒေသကြီးမှာ တည်ရှိနေတဲ့ တရုတ် ဆေးခန်းများနဲ့ တရုတ်ဆေးဆရာဝန်များကို ဆေးကု သခွင့် ပြုထားခြင်း မရှိကြောင်း ရန်ကုန်တိုင်းဒေသကြီး အစိုးရအဖွဲ့ လူမှုရေး ၀န်ကြီးရဲ့ ပြောကြားမှုအရ သိရသည်။

ဒီဇင်ဘာ ၁၂ရက်နေ့က ကျင်းပတဲ့ ရန်ကုန်တိုင်း ဒေသကြီး လွှတ်တော် အစည်းအဝေးမှာ စမ်းချောင်းမြို့ နယ်၊ တိုင်းဒေသကြီး လွှတ်တော် ကိုယ်စားလှယ်က တရုတ်ဆေးခန်းများနှင့် တရုတ် ဆရာဝန်များကို ဆေး ကုသခွင့်ပြုရာမှာ သက်ဆိုင်ရာ ဆေးပညာ တတ်ကျွမ်းမှု အထောက်အထား လိုင်စင်ရှိ၊ မရှိ သိရှိ လိုကြောင်း မေးမြန်းမှုကို တိုင်းဒေသကြီး အစိုးရ အဖွဲ့ လူမှုရေး ၀န်ကြီးက ဖြေကြားခဲ့ခြင်း ဖြစ်တယ်။

“ရန်ကုန်တိုင်းဒေသကြီးအတွင်း တရုတ် ဆေးခန်းများနှင့် တရုတ် ဆေးဆရာဝန်များ ခွင့်ပြုချက်မရှိ က ဆေးကုသခွင့် မပေးပါ။ ယနေ့အထိ ခွင့်ပြုထားသော တရုတ်ဆေးခန်း၊ တရုတ်ဆေး ဆရာဝန်များ မရှိသေးပါ”ဟု တိုင်းဒေသကြီး အစိုးရအဖွဲ့၊ လူမှုရေးဝန်ကြီးက လွှတ်တော်မေးခွန်း မေးမြန်းမှုများကို ၂၀၁၃၊ ဒီဇင်ဘာ ၁၂ ရက်နေ့ ကတည်းက ဖြေကြားခဲ့ခြင်း ဖြစ်တယ်။

ဒီလိုဖြေပြီးရင် ပြီးရောလား။ ဥပဒေထဲ အကျုံးဝင်အောင် စည်းမျဉ်းစည်းကမ်းများ ရေးဆွဲ သတ်မှတ်ပေးရ မယ်။ မည်သူ့ကို သွားရောက် စစ်ဆေးခံရမယ်။ မည်သည့်ဌာန၊ မည်သည့်ပုဂ္ဂိုလ် အဖွဲ့က ဖြေရှင်း စစ်ဆေးပေးမယ်။ ဥပဒေ မလိုက်နာရင် အရေးယူမှု အပိုင်းကို မည်သူတွေ ပါဝင်ရမယ်။ ဒဏ်ငွေနှင့်မ ပြီး၊ ထောင်ဒဏ်ကျခံရမယ်။ ဆေးခန်း ထူထောင်သူနှင့်မပြီး၊ ဆေးကုသပေး နေတဲ့ တရုတ် ဆရာဝန်နှင့်မ ပြီး၊ ဆေးခန်းဖွင့်တဲ့ အသိုင်းအ၀ိုင်း အားလုံးကို နောင်ကြဉ်သွားအောင် အပြစ်ပေးရမယ်။ ဒီလို လုပ်ကိုင်ခွင့် ကိုလည်း တည်ဆဲ ဥပဒေအရ အာဏာပိုင်မှာ အခွင့်အရေး အပြည့်ပေးထားရမယ်။

ဆရာဝန်၊ ဆရာမများ၊ ဆေးခန်းဆေးရုံဆိုတာ မြန်မာလူမျိုးများ အားကိုးရာဟု ခံယူထားသည် နှင့်အညီ ဥပဒေကို လက်တစ်လုံးခြားယူ၍ တရုတ်ဆရာဝန်၊ တရုတ် ဆေးခန်းကို မြို့လယ်ခေါင်မှာ ရဲဝံ့စွာ ဖွင့်လှစ်နေ တာ ကုသပေးနေတာဟာ လက်ကမ်း ကြော်ငြာနေတာဟာ အစိုးရက မသိချင်ယောင် ဆောင်နေတာလား။ အင်အားနည်းလို့ အစုအဖွဲ့ဖြင့် မသွားနိုင်လို့ ခွင့်ပြုနေသလို ဖြစ်နေတာလား။ မသိတာ မဟုတ်ဘူး။ မပိုင်သေးလို့လား။

တစ်ခုရှိသည်မှာ ခွင့်ပြုထားရှိပြီး ဆေးခန်း၊ မြန်မာ ဆရာဝန် ဆေးခန်းကိုပဲ တိုးချဲ့ဖွင့်လှစ်ထားခြင်းမျိုး ဖြစ် တယ်။ နာမည် ဆရာဝန်နှင့် ဆေးခန်းမှာ ခွင့်ပြုချက် ရရှိပြီး တရားဝင် ဖွင့်လှစ်ထားခြင်းမျိုးဖြစ်ပြီး တရုတ် ဆေးခန်းများက တိုးချဲ့ထားခြင်းမျိုး ဖြစ်တယ်။ ဒီတော့ စိစစ်ရမည့် အခန်းကဏ္ဍ ပါဝင်လာရတယ်။ ဒီဆေးခန်းမှ နာမည်၊ မှတ်ပုံတင် မထားသော ဆေးရုံ၊ ဆရာဝန်၊ ကျွမ်းကျင်သူများ ကုသခွင့်မရှိ ဆိုရမလား။ သက်ဆိုင်ရာ ဆရာဝန်မှအပ အခြားမသက်ဆိုင်သူများ ကုသခွင့် မရှိ ဆိုရမလား။ ဆေးခန်းအနီး ၀န်းကျင်တွင် မသက်ဆိုင်သူများ မရှိရဆိုရမလား။ လုပ်နေသူများကတော့ ဥပဒေကို လက်တစ်လုံးခြား လုပ်နေတာလည်း ဖြစ်တယ်။

အရေးယူသည့်အပိုင်း နည်းနေတာကို အခွင့်ကောင်းယူပြီး လက်ကမ်း စာအုပ်ဖြင့် ကျယ်ပြန့်စွာ ကြော်ငြာ လာသလို ထဲထဲဝင်ဝင် လုပ်ဆောင်လာတော့ ယုံကြည် သွားရောက်တဲ့ မြန်မာလူမျိုးတို့မှာ ငွေ ကုန်ကြေးကျများ၊ အချိန်ကုန်၊ ဘေးထွက်ဆိုးကျိုး အနာတရများ၊ ကံဆိုးလျှင် အိတ်ခ်ျအိုင်ဗီ၊ ဘီနှင့်စီပိုး ကူးစက်ခြင်း ခံရနိုင်ပါတယ်။

လက်ရှိ ခေတ်မီဆေးကုခန်း၊ အမှတ်(၈)၊ စဥ့်အိုးတန်း အောက်လမ်း၊ လသာမြို့နယ်၊ ရန်ကုန်မြို့၊ ဖုန်း-၀၉-၄၂၁၁၈၀၈၀၀။ ညွှန်းဆိုထားတဲ့ ဆေးခန်းနည်းတူ အများအပြားမှာ ပေါ်ပေါက်လာတဲ့ ခေတ်မီ နည်းဖြင့် ဆေးကုသပေးမည်ဆိုတဲ့ တရုတ်ဆေးခန်းများကြောင့် သာမန်ပြည်သူများ ငွေကြေးကုန်ကျမှု များနှင့် ဘေးထွက် ဆိုးကျိုးများ ဖြစ်ပေါ်နေရတာ များလှပါပြီ။ ယင်းကို တရားဝင် အသိအမှတ်ပြု ဆေးခန်း ဟုတ်မဟုတ်ကို စမ်းချောင်းမြို့နယ် ပြည်သူ့လွှတ်တော် ကိုယ်စားလှယ်က မေးမြန်းခဲ့ခြင်း ဖြစ်ပါတယ်။

တရုတ်ဆရာဝန်များ အနေဖြင့် တစ်ခု ဆိုးရွားလွန်းသည်မှာ အင်္ဂလိပ်ဘာသာ စကားဖြင့် မေးမြန်း ကုသခြင်း မျိုး မဟုတ်ဘဲ တရုတ် ဘာသာပြန်ဖြင့် မေးမြန်းကုသကာ တစ်ဆိတ်တစ်အိတ် လုပ်ကာ ရောဂါကို ချဲ့ကား ခြိမ်းခြောက်ခြင်းမျိုး ပါနေတယ်။ “ပန်းသေပန်းညှိုး၊ ကျောက်ကပ် အားနည်းခြင်း၊ သုတ်လွှတ်မြန်သော ရော ဂါများမှ နေထိုင်မှုဘ၀ အတွက် အရေးတကြီး၊ အသည်းအသန် ဖြစ်နေခြင်း၊ အလုပ်ဖိအားများခြင်း သို့မဟုတ် ကွင်းတိုက်ခြင်းတို့မှာ အမျိုးသား အင်္ဂါကျုံ့ယုံ့သွားခြင်း၊ ပန်းသေပန်းညှိုးခြင်း၊ သုတ်ပိုးနည်းခြင်း (သို့) သေခြင်း၊ သားသမီးမရ မြုံခြင်း ဖြစ်ရကြောင်း” မယဉ်ကျေး စော်ကားတဲ့ မြန်မာစာလုံးသုံးပြီး ထဲထဲဝင်ဝင် ကုသနေတယ်။ ဆေးတစ်ဖုံ သိန်းနှင့်ချီ ပေးပြီး မပျောက်တဲ့ဆေး ဖြစ်နေတယ်။

ခေတ်မီ ဆေးကုခန်းဟာ အချိန်ကာလ ကြာရှည်စွာဖြင့် ယာထိုက် အမျိုးသား ရောဂါသုတေသန ဌာန၊ နိုင်ငံ တကာ အမျိုးသား ရောဂါအစည်းအရုံး စသည်တို့နှင့် ပူးပေါင်းခဲ့တဲ့ ပမာဏ ကြီးမားတဲ့ နည်းပညာ စွမ်းအားရှိပြီး မြန်မာနိုင်ငံမှာ တစ်ဦးတည်းသော နိုင်ငံတကာမှာ ခေတ်စားနေသည့် “ဒီအီးအေ (DEA) အာရုံကြောဆေးထိုး ကုသနည်း”ကို အသုံးပြုပြီး ကျောက်ကပ် အားနည်းခြင်း၊ သုတ်လွှတ်မြန်ခြင်း၊ ပန်းသေပန်းညှိုး၊ အမျိုးသား အင်္ဂါသေးငယ်သွားခြင်း စသောရောဂါများ အထူးကုသ ပေးနေတယ် ဆိုတယ်။ အမျိုးမျိုးသော အထောက်အကူပြု ဇီဝရှင်သန် သဘောရှိတဲ့ အစိတ်အပိုင်းများ ပါဝင်ကြောင်းနဲ့ ခန္ဓာကိုယ်တွင်း လိုအပ်ပမာဏရှိတဲ့ ဒြပ်ကို အချိန်မီ တက်ကြွစေကြောင်း၊ ဆေးဝါး အသုံးပြုလိုက်တာနဲ့ ထိရောက်မှုရှိကြောင်း၊ အမျိုးသား အင်္ဂါကိုလည်း ဖွံ့ဖြိုးလာစေကြောင်း၊ ဆေးကုသမှု တစ်ကြိမ်တည်းဖြင့် သက်သာစေကြောင်း၊ အမျိုးသားကို မာန်တစ်ကြိမ် ထပ်မံ တက်ကြွစေကြောင်း၊ ကမ္ဘာ့မြောက်မြားစွာသော အမျိုးသားများ အတွက် သတင်းကောင်း ဖြစ်ကြောင်း မဟုတ်တရား ညွှန်းဆိုထားတယ်။

၂၀၁၃ ခုနှစ် အောက်တိုဘာ အတွင်းက ရန်ကုန်မြို့ထဲ တရုတ် တိုင်းရင်း ဆေးခန်း တစ်ခုမှာ ပြ သ ဆေးကုသမှု ခံယူခဲ့တဲ့ အမျိုးသမီးမှာ ခြေထောက်ဖြတ်ရတဲ့အထိ ဘေးထွက်ဆိုးကျိုး ဖြစ်ပေါ်ခဲ့မှု နစ်နာခဲ့တယ်။ နစ်နာသူ ကာယကံရှင်များက ပြည်တွင်း မီဒီယာများကို ထုတ်ဖော်ဖြေကြားမှုများ ပြုလုပ်ခဲ့ တဲ့ ဖြစ်စဉ်ဖြစ်တယ်။ ယင်းကဲ့သို့ အမျိုးသားများမှာ ငွေသာကုန်ပြီး အချိန်ကုန် လူပန်း၊ ဘေးထွက် ဆိုးကျိုးများတဲ့ ဒီအီးအေ (DEA)ကုသချက်ကြောင့် မရှုမလှ ခံခဲ့ရတာမျိုး ရင်ဖွင့်ခဲ့ကြတာ နား နှင့်မဆန့် ကြားနေရပါတယ်။

ဘာဖြစ်လို့ မဖမ်းသေးတာလဲ။ အထက်ကဆိုခဲ့သလို တရားဝင် အသိအမှတ်ပြုပြီး ဆေးခန်းမှ ဆရာဝန်များ က နာမည်ခံ ပေးနေကြလို့ ယင်းဆရာဝန်များက သူတို့ လူနာများ သူတို့ဖာသာ ကြည့်ပြီးရင် ပြီးရော သဘောထားခဲ့သလား။ အမည်နာမ အလွဲသုံးမှုကို ငွေကြေး တစ်စုံတစ်ရာနှင့် လဲလှယ် ခွင့်ပြုထား သလိုမျိုး ဖြစ်နေတော့သာ မြန်မာနိုင်ငံ ဆရာဝန် အသင်းမှလည်း အမည်ခံ ဖမ်းဖို့ခက်နေတာလည်း ပါဝင်နေမှာပါ။ ခက်တာက ယင်းအနှီဆရာဝန်များက မကြောက်မရွံ့ နာမည်ခံ ပေးနေရတာလဲ။

ပကတိ အခြေအနေကို သုံးသပ်ပြီး သကာလ ဒီလိုဆေးခန်းမျိုး အရေးယူပေးသင့်ပါပြီ။ နိုင်ငံတော် အနေဖြင့် “ပွင့်လင်းမြင်သာသော ဒီမိုကရေစီ စနစ်သို့” သွားရောက်ရာတွင် ယင်းကဲ့သို့သော အပုပ်နံ့ ထွက် သည့် ဆေးခန်းဆေးရုံများ ရှိနေခြင်းက လုံးဝသင့်တော်မှု မရှိပါ။ ဒီ့ထက် ဆိုးရွားစွာ ကိုယ်ဝန် ဖျက်ပေးခြင်း၊ လိင်အင်္ဂါ ခွဲစိတ် ဖြတ်တောက်ပြုပြင်ပေးခြင်းများ တရားဝင် လုပ်လာကြလျှင် မခက် ပြီလော။ မြန်မာနိုင်ငံ ဆရာဝန်များ အသင်းနှင့် ဆေးကောင်စီတို့ သေသေချာချာ စဉ်းစား လုပ်ဆောင်သင့်ပြီ ဖြစ်ပါတယ်။

“ငါးခုံးမ တစ်ကောင်ကြောင့် တစ်လှေလုံးပုပ်” မခံရအောင်၊ ယနေ့ တာဝန်ရှိသူများက နောင်အရေး ကြိုတွေးမြင်ခြင်းအားဖြင့် အနှီဆေးခန်းများ ပြင်းပြင်းထန်ထန် အရေးယူ ပေးသင့်ပါတယ်။ အဖွဲ့ တစ်ဖွဲ့နှင့် မလုံလောက်ရင် နှစ်ဖွဲ့ သုံးဖွဲ့ပေါင်းပြီး ဆောင်ရွက်သွားကြဖို့ လိုပါတယ်။ မြန်မာနိုင်ငံ ဆေးကောင်စီ၊ အလုပ်သမား ၀န်ကြီးဌာန၊ ပြည်ထဲရေး ၀န်ကြီးဌာန၊ မြို့ရွာအိုးအိမ်၊ မြူနီစီပယ် အဖွဲ့ စသဖြင့် ပူးပေါင်းဆောင်ရွက် အကောင်အထည်ဖော်ဖို့ လိုအပ်လှပါပြီ။ အခိုက်အတန့် ဖြေရှင်းသလိုမျိုး မဟုတ်ဘဲ တစ်သက်လုံး နောင်ကြဉ်အောင် ဆောင်ရွက်ပေးဖို့ လိုပါတယ်။

မီဒီယာများကလည်း ယင်းဆေးခန်းများ အရေးယူပေးခြင်း မရှိလို့ ဇောင်းပေးရေးသားနေကြတာလည်း များပါပြီ။ ပြည်သူတွေကလည်း အရေးယူပေးမှု အခြေအနေကို စောင့်ကြည့်နေကြပါတယ်။ ယနေ့ထိ တရုတ်ဆေးခန်းများကလည်း ပြောင်ကျကျ ဖွင့်လှစ်ကြော်ငြာ ကုသပေးနေဆဲ၊ ၀င်လာတဲ့ လူနာများအား ရိုက်စား ဆောင်ရွက်နေဆဲ၊ ၀င်ငွေများ ၀င်လာမစဲ တသဲသဲဖြစ်ဆဲပင် ဖြစ်တယ်။

“ခွင့်ပြုချက် မရှိဘဲ ဆေးခန်း ဖွင့်လှစ်ထားတဲ့ ဆေးခန်းများ စစ်ဆေး အရေးယူခြင်းများကို စစ်ဆေး အရေးယူရန် သက်ဆိုင်ရာ မြို့နယ် ကျန်းမာရေးမှူး၊ ခရိုင် ကျန်းမာရေးမှူးများ ညွှန်ကြားထားပြီး အထွေထွေ အုပ်ချုပ်ရေး ဦးစီးဌာနကိုလည်း တရားမ၀င် ဆေးခန်းများကို စစ်ဆေး အရေးယူ ခိုင်းထားကြောင်း” ပြည်သူ့ လွှတ်တော် ကိုယ်စားလှယ်က ဖြေကြားရုံဖြင့် ယင်းဆေးခန်းများ မပျောက်ပျက်နိုင်ကြောင်း၊ ပြည်သူတစ်ဦး အနေဖြင့် ပါဝင် ကန့်ကွက် ဆန္ဒပြသွားဖို့ လိုပါကြောင်း ထပ်တောင်းဆိုပါရစေ။
ဒေါက်တာ ထူးပြည့်စုံသျှင်
Tomorrow

0 comments:

Post a Comment