Saturday, January 4, 2014

အခြေခံဥပဒေပြင်ပေးဖို့ နေပြည်တော်မှာ တစ်ကိုယ်တော် ဆန္ဒပြတောင်းဆို

ဖွဲ့စည်းပုံ အခြေခံဥပဒေ ပြင်ဆင်ပေးရေးနဲ့ တရားမ၀င် စီတန်းလှည့်လည်မှု ပုဒ်မ ၁၈ ကို ဖျက်သိမ်းပေးဖို့အတွက် နေပြည်တော်မှာ တစ်ကိုယ်တော် လမ်းလျှောက်ဆန္ဒပြခဲ့ပါတယ်။

၂၀၀၈ ဖွဲ့စည်းပုံ အခြေခံဥပဒေဟာ ဒီမိုကရေစီစံနှုန်းတွေနဲ့ မကိုက်ညီတဲ့အတွက် ပြင်ပေး ဖို့ တောင်းဆို တာဖြစ်ကြောင်း တစ်ကိုယ်တော် ဆန္ဒပြသူ ဦးသာချို က သတင်းထောက်တွေကို အခုလိုပြောပါတယ် ။

"၂ဝဝ၈ ဖွဲ့စည်းပုံ အခြေခံဥပဒေက ပြင်ဆင်ပေးရမှာ ဖြစ်ပါတယ်၊ သူက ဒီမိုကရေစီရဲ့ စံချိန်စံညွှန်းနှုန်းတွေ နဲ့ မကိုက်ညီတဲ့ ဥပဒေဖြစ်လို့ပါ၊ ပုဒ်မ ၁၈ ကလည်း ဒီမိုကရေစီရဲ့ စံချိန်စံညွှန်းနှုန်းတွေနဲ့ မကိုက်ညီတာက ပုဒ်မ ၃၅၄ မှာက လွတ်လပ်စွာ စုဝေးပိုင်ခွင့်၊ လွတ်လပ်စွာ စည်းရုံးပိုင်ခွင့်၊ လွတ်လပ်စွာ ပြောဆိုပိုင်ခွင့် ရှိတယ်ဆိုပြီးတော့ ပြောထားပြီးတော့ အခုပုဒ်မ ၁၈ ကလိုက်ပြီးတော့ ပိတ်သိမ်းထားပါတယ်ခင်ဗျ"

မူလက ပျဉ်းမနားမြို့လယ် ဗိုလ်ချုပ်လမ်းကနေပြီး နေပြည်တော်သမ္မတ ဦးသိန်းစိန်ရဲ့ အိမ်တော်အထိ လမ်းလျှောက်သွားဖို့ ပြင်ဆင်ခဲ့ပေမယ့် မြို့နယ်ရဲတပ်ဖွဲ့မှူးက တားဆီးခဲ့တဲ့အတွက် ပျဉ်းမနား ရှမ်းကန်ရပ် ကွက်မှာပဲ သူ့ရဲ့ဆန္ဒပြပွဲကို အဆုံးသတ်ခဲ့ပါတယ်။

ခွင့်ပြုချက်မရဘဲ ဆန္ဒပြတဲ့အတွက် ပုဒ်မ ၁၈ နဲ့ အရေးယူသွားမယ်လို့ ပျဉ်းမနားမြို့နယ် ရဲတပ်ဖွဲ့မှူး ရဲမှူး ဦးသန်းမြင့်က ပြောပါတယ်။

"ခွင့်မပြုဘဲနဲ့ စီတန်းဆန္ဒပြတဲ့အတွက်ကြောင့်မို့ ကျနော်တို့က လမ်းလျှောက်ဆန္ဒပြတဲ့အတွက် ပုဒ်မ ၁၈ နဲ့ အရေးယူပါမယ်၊ ခွင့်မပြုတဲ့အတွက် တားခြင်းဖြစ်ပါတယ်၊ တားတာကို ဆက်လုပ်တဲ့အတွက် အရေးယူပါမယ်"

ဆန္ဒပြသူ ဦးသာချိုကတော့ သူ့အနေနဲ့ ဆန္ဒပြခွင့် တောင်းခံခဲ့ပေမယ့် မြို့နယ်ရဲတပ်ဖွဲ့မှူးက ခွင့်မပြုခဲ့ဘူးလို့ ပြောပါတယ်။
RFA Burmese