Wednesday, November 27, 2013

လျော်ကြေးမရှိသော မြေများကို တိုင်းတာရာတွင် ITD ဝန်ထမ်းနဲ့ ဒေသခံများ ပြဿနာဖြစ်

ထားဝယ်ရေနက်ဆိပ်ကမ်းနှင့် ထိုင်းနိုင်ငံ ကန်ချာနပူရီသို့ ဖောက်လုပ်သော လမ်းတလျှောက်တွင် ပါရှိသော ခြံမြေများကို လျော်ကြေးများပေးသော်လည်း ၃၇ ကီလိုမီတာအလွန်မှ ၄၃ ကီလိုမီတာအကြား ရှိ လျော်ကြေးမရရှိသေးသော ခြံပိုင်ရှင် ၄၇ ဦးပိုင်မြေများကို တိုင်းတာရာတွင် ITD ဝန်ထမ်းနဲ့ ဒေသခံ များ ပြဿနာဖြစ်ခဲ့သည်။



ခြံပိုင်ရှင်တဦးဖြစ်သူ ဦးအောင်မြင့်က “ကျနော်ခြံက ဧက ၂၀ လောက်ရှိပါတယ်၊ လမ်းဖောက်လုပ်တာက ခြံအလယ်ဖြတ်ပြီး အရှည် ၁၈၀၀ ပေ အကျယ် ပေ ၄၀ ကျော် ပါသွားတယ်၊ လမ်းစလုပ်တာက ၂၀၁၁ ကတဲကပါ ဒါပေမဲ့ ကျနော်တို့ကို ခုအချိန်ထိ မလျော်သေးဘူး” ဟု ရှင်းပြခဲ့သည်။


ထိုပြဿနာအား ဥယျာဉ်ခြံမြေပိုင်ရှင်ဖြစ်ကြသော ကလုံးထာကျေးရွာသူ/သားများက ကျေးရွာအုပ် ချုပ်ရေးမှူးထံ တင်ပြရာ ထိုမှတဆင့် မြို့နယ်အုပ်ချုပ်ရေးမှူး ရေနက်ဆိပ်ကမ်းအထောက်ကူပြုအဖွဲ့အထိ တင်ပြခဲ့သောကြောင့် အထောက်ကူပြုဖွဲ့ ဥက္ကဌက ကျန်ရှိသော ဥယျာဉ်ခြံမြေများကို တိုင်းပြီးမှတ် သားတင်ပြရန် အဖွဲ့တခုဖွဲ့ပြီး လုပ်ဆောင်ရန် ညွှန်ကြားခဲ့ကြောင်း သိရှိရသည်။

အဆိုပါ မြေတိုင်းတဲ့အဖွဲ့က နိုဝင်ဘာ ၂၀ ရက်နေ့က စတင်တိုင်းတာခဲ့ပြီး ၂၁ ရက်နေ့က တိုင်းတာရာတွင် ITD မှ တာဝန်ခံတယောက်က ပြေလည်အောင် ညှိနှိုင်းဆောင်ရွက်မှု မပြုလုပ်ပဲ ရိုင်းပြစွာ ဆက်ဆံပြော ဆိုသောကြောင့် ဒေသခံရွာသူ/သားများနဲ့ ပြဿနာဖြစ်ပွားခဲ့သည်။

အဆိုပါက္စနဲ့ပတ်သက်ပြီး ဒေသခံများအရေးဆောင်ရွက်နေတဲ့ ကိုစိုးသိန်းက “အခုလုပ်ရပ်က ထိုင်းရော စကားပြန်ပါ တော်တော်ရိုင်းပါတယ်၊ သူတို့လုပ်ဆောင်ပုံတွေက ဒေသခံများကို ဂရုစိုက်စရာမလိုဘူး ပုံဖြစ်တယ်လေ ရင်ကော့ ပြတယ် နောက်ဒေသခံတွေဘက်ကို လက်ညှိုးထိုးပြောတယ်လေ ဒါမလုပ်သင့်ဘူး သူက စတင်ပြီးစိန်ခေါ်တယ်လေ လမ်းပိတ်ချင်ပိတ်ပါ ပြောတယ်” ဟု ပြန် လည်ရှင်းပြခဲ့သည်။

ITD လမ်းတာဝန်ခံက မြေဧရိယာတိုင်းတာရာတွင် အပင်စာရင်းကို မထည့်ရန်ပြောရာ မနေ့က အပင်စာရင်းထည့်လာ ပြီးပြီ ဘာမှမဖြစ်ဘူး အခုမှဘာဖြစ်လို့လဲလို့ပြန်မေးရာ အပင်စာရင်းထည့်ရမှာက ငါတို့တာဝန်ပါ ငါပြောတာလုပ်ပါ ပြောသောကြောင့် ရွာသားများက မကျေနပ်သဖြင့် စကားအခြေတင်ပြောခဲ့ပြီး ပြောဆိုရာ မပြေလည်သောအခါ ရွာသားများက ဆိုင်ကယ်များဖြင့် လမ်းကိုပိတ်ဆို့ထားပြီး ITD က တာဝန်ခံနိုင်သူနဲ့မှ ပြောမည် ခေါ်ပေးရန် ပြောသော်လည်း သူမခေါ်နိုင်ဘူးပြောပြီး ဒီအတိုင်းနေခဲ့တယ်၊ ကုမ္ပဏီမှ ကားတစ်စီလွှတ်ပြီး ITD တာဝန်ခံမြို့နယ် အုပ်ချုပ်ရေးမှူးအကြောင်းကြားလို့ သူတို့ကိုလည်းပြန်ချင်ပြန်ပါ ကားထားခဲ့ပြောပါတယ်။ အဲဒီချိန်မှာ အဆိုပါ ထိုင်းလူမျိုးကစပြီး ကျေးရွာသူ/သားများ လက်ညှိးထိုး ရင်ကော့ပြ ပုံစံလုပ်ပြပြီး နင်တို့လမ်းပိတ်ချင်ပိတ်ပါ လည်းပြောခဲ့ပါတယ် သူသာမဟုတ် ဘာသာပြန်ဖြစ်သူ ကရင်လူမျိုး စောခူဆေးကလည်း မကျေနပ်သော အမူအရာဖြစ်လုပ်ပြပြီး ဓါတ်ပုံရိုက်ပါတယ်။ ညနေ ၃း၃၀ ခန့်စတင်ဖြစ်ရာ ည ၈း၃၀ တွင် ITD တာဝန်ခံ မစ္စတာ ဖန်နိုနှင့် အောင်ဇော်ဝင်းလာရောက်ကာ မနက်ဖြန် ပြေလည်အောင်တိုင်းတာပေးပါမယ်၊ လျော်ကြေးရရန် သူတာဝန်ယူခဲ့ပါ တယ်။ ကျေးရွာသူ/သားများက မနက်ဖြန်လာတိုင်းလျင် ထိုထိုင်းလူမျိုးမလာစေရဘူး ထပ်ဆင့်ပြောခဲ့ပါတယ်လို့ မြေတိုင်းရာတွင် ပါဝင်သူ ဒေသခံများက ရှင်းပြခဲ့သည်။

အပင်စာရင်းပြုစုရာတွင် ပါဝင်သော ကလုံးထာကျေးရွာ အုပ်ချုပ်ရေးမှူးက “တကယ်ကို တရားလွန်ပါတယ် ခုတိုင်းတာ စာရင်းပြုစုစေတာကလည်း လျော်ကြေးပေးနိုင်အောင် ရေနက်ဆိပ်ကမ်းအထောက်ကူပြုအဖွဲ့က ဥက္ကဌက ပြေလည်အောင်လုပ်ဆောင်စေတာပါ၊ ITD က လမ်းတာဝန်ခံက စိန်ခေါ်လို့ လုပ်တာပါ၊ နောက် ITD နှင့် ထောက်ကူပြုအဖွဲ့က သူတို့လူတွေကိုပြန်ပေးဆွဲထားတယ်လို့ တိုင်းရဲတပ်ဖွဲ့မှူးကို တိုင်သေးတယ်လေ၊ ITD ကထွက်ခွာနေရပြီလေ လမ်းလုပ်တာကလည်း သူတို့လုပ်တာဆိုတော့ အမြန်ဆောင်ရွက်ပေးရန် ထောက်ကူပြုအဖွဲ့ဥက္ကဌက လုပ်ခိုင်းတာပါ ၂၂ ရက်နေ့ တိုင်းတာရန် ထိုင်းအဖွဲ့ကလာတော့လည်း တိုင်းရဲတပ်ဖွဲ့မှ လုံခြုံရေးအရ တိုင်းတာကို ရပ်နားထားဖို့ ပြောလာလို့ ရပ်နားထားရတယ်။ ရေနက်ဆိပ်ကမ်း အထောက်ကူပြုအဖွဲ့ကလည်း ဥက္ကဌမရှိတော့ ပြဿနာဖြစ်လာလျှင် ရှင်းလင်းတာဝန်ခံမရှိလို့ ဖြစ်ပါတယ်” ဟု ထားဝယ်လူထုအသံကို ရှင်းပြခဲ့သည်။
Tavoyan Voice